BENSOUDA: VIONGOZI WA BURUNDI WATASHITAKIWA HATA WAKIJITOA ICC

Mwendesha mashitaka mkuu wa Mahakama ya Kimataifa ya Uhalifu (ICC), Fatou Bensouda ametoa ishara kubwa kuwa mipango ya baadhi ya nchi za Afrika kutaka kujiondoa kwenye uanachama wa mahakama hiyo haitaathiri kwa vovyote uchunguzi unaoendelea dhidi ya makosa ya uhalifu wa kivita. Aliapa kuendelea kuwachunguza wahalifu wanaotenda unyama huo.

Fatou Bensouda amesema kuwa mahakama yake itaendelea na uchunguzi wake wa awali nchini Burundi ambao ulianza hmwezi Aprili, kwa sababu anaungwa mkono na zaidi ya nchi 120 wanachana wa mahakama hiyo.

Ghasia ziliibuka nchini Burundi mwezi Aprili mwaka jana baada ya Rais Pierre Nkurunziza kutangaza kuwania muhula wa tatu madarakani. Ghasia hizo zimesababisha zaidi ya Warundi laki tatu kukimbia nchi jirani.

Mwezi Oktoba na Novemba mataifa ya Burundi, Afrika Kusini na Gambia yalitoa taarifa mbele ya Umoja wa Mataifa juu ya kusudio lao la kujiondoa kwenye mahakama hiyo. Hata hivyo, kujiondoa kwao kutaanza kufanya kazi rasmi baada ya mwaka mmoja.

Kama ilivyo kwa mataifa mengine ya Afrika, mataifa hayo yanaituhumu ICC kuwa ina upendeleo dhidi ya Afrika. Washukiwa 5 waliotiwa hatiana na mahakama hiyo wanatoka Jamhuri ya Kidemokrasia ya Congo, Jamhuri ya Afrika ya Kati na Mali.

Lakini ICC imekanusha tuhuma hizo za upendeleo ikisema kuwa kesi nyingi ziliwasilishwa na serikali zenyewe za Kiafrika.

Waziri huyo wa zamani wa Gambia amenukuliwa na shirika la habari la Reuters akisema: “Hata kama nchi moja ikiamua kujiondoa ICC, taifa zima la Afrika linakuwa limerudi nyuma na hilo ni jambo baya kwa bara lote.”

Hata hivyo, ametupilia tuhuma kwamba kesi zote za ICC zinatoka Afrika akiashiria kuwa mahakama hiyo ina uchunguzi wa kesi 10 za uhalifu katika mataifa ya Afghanistan, Colombia, Georgia, Iraq, Palestina na Ukraine.

Wakati kuna wasiwasi wa mataifa mengi kujiondoa kutoka mahakama hiyo, hasa mataifa ya Afrika, Bensouda amesema kuwa mataifa mengine wanachama yamesisitiza kushirikiana na mahakama hiyo yenye mamlaka ya kushughulikia uhalifu wa kivita, uhalifu dhidi ya binadamu na mauaji ya kimbari.

Urusi ambayo haijawa mwanachama rasmi wa mahakama hiyo lakini ilisaini Mkataba wa Roma, mwezi huu ilisema kuwa itaondosha saini yake. Ufilipino nayo inafikiria kuondoa uanachama wake.

Mahakama hiyo iliyoanzishwa Julai 2002, imekuwa kama kimbilio la mwisho la waathirika ya kivita ambapo huingilia kati pindi mifumo ya kimahakama ya mataifa wanachama inaposhindwa kuchukua hatua dhidi ya uhalifu wa kivita.

About Unknown

This is a short description in the author block about the author. You edit it by entering text in the "Biographical Info" field in the user admin panel.