PAULO JORGE GOMES BENTO KUINOA URENO HADI MWAKA 2016

 

Shirikisho la soka nchini Ureno, limekamilisha mpango wa kusaini mkataba mpya na kocha mkuu wa timu ya taifa ya nchi hiyo Paulo Jorge Gomes Bento, ambae kwa sasa anatafakari namna ya kukisaidia kikosi chake kwa ajili ya fainali za kombe la dunia za mwaka 2014.

Shirikisho la soka nchini Ureno limekamilisha mpango huo baada ya kufanya mazungumzo na kocha Bento ambapo iliionekana kuna haja ya pande hizo mbili kuendelea kufanya kazi kwa pamoja.

Sababu kubwa ambayo ilifanya mazungumzo ya pande hizo mbili kuanzishwa mwanzoni mwa mwaka huu, ni hatua ya timu ya taifa ya Ureno kufaulu kucheza fainali za kombe la dunia za mwaka huu ambazo zitafanyika nchini Brazil, baada ya kuifunga timu ya taifa ya Sweden mabao manne kwa mawili katika mchezo wa hatua ya mtoano ukanda wa barani Ulaya mwaka jana.

Kocha huyo mwenye umri wa miaka 44, ambae alichukua jukumu la kukinoa kikosi cha timu ya taifa ya Ureno mwaka 2010, akichukua nafasi ya Carlos Queiroz, amekubalia kusaini mkataba wa miaka miwili ambao utamuweka madarakani hadi mwaka 2016.

Bento amesema hatua ya kusaini mkataba mpya imempa nafasi ya kuamini bado mchango wake unahitajika katika harakati za kuisaidia timu ya taifa ya Ureno, ambayo katika fainali za kombe la dunia za mwaka huu zitakazochezwa nchini Brazil imedhamiria kufika mbali tofauti na katika fainali zilizopita.

“Sina budi kufanya kinachokusidiwa na kila mmoja anaeipenda timu ya taifa ya Ureno, na nitahakikisha ninafanya kazi yangu kwa uadilifu mkubwa kwa kusaidiana na watu wangu wa karibu kwa lengo la kukabiliana na changamoto zilizo mbele yetu” Amesema Paulo Bento.

“Najua nina kibarua kingine mara baada ya fainali za kombe la dunia za mwaka 2014, nitatakiwa kuipeleka Ureno katika fainali za mataifa ya barani Ulaya za mwaka 2016, hivyo sio kazi ndogo kwangu” Amesisitiza Bento ambae aliwahi kuitumikia timu ya taifa ya Ureno kuanzia mwaka 1992 hadi mwaka 2002.

Kabla ya kuifikisha timu ya taifa ya Ureno kwenye fainali za kombe la dunia za mwaka 2014, Paulo Bento aliifikisha timu hiyo kwenye hatua ya nusu fainali katika michuano ya barani Ulaya ya mwaka 2012, kabla ya kutolewa kwa mikwaju ya penati na mabingwa wa soka barani humo timu ya taifa ya Hispania.

Katika fainali za kombe la dunia za mwaka 2014, timu ya taifa ya Ureno imepangwa katika kundi la saba sambamba na timu ya taifa ya Marekani, Ghana pamoja na Ujerumani.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.