RAIS WA ZAMANI WA BRAZIL JELA MIAKA 9 KWA UFISADI

Rais wa zamani wa Brazil Luiz Lula da Silva

Kiongozi wa zamani wa Brazil, Luiz Inacio Lula da Silva, ambaye ni mshindani mkuu anayewania kushinda katika uchaguzi wa mwakani wa kiti cha urais, amekutwa na hatia ya ufisadi na kuhukumiwa kutumikia kifungo cha miaka tisa na nusu jela.

Hukumu hiyo ni anguko kubwa kwa Lula, ambaye ni mmoja wa wanasiasa maarufu sana nchini humo, na ni pigo dhidi ya azma yake ya kurudi kwenye ulingo wa siasa. Kiongozi huyo wa zamani wa chama cha wafanyakazi, ambaye alisifiwa sana kimataifa kwa sera zake za kupunguza ukosefu wa usawa nchini mwake, anakabiliwa na kesi nyingine nne za ufisadi na mustakbali wake unategemea rufaa atakayoikata.

Hukumu hiyo ni ya aina yake dhidi ya kiongozi aliyewahi kushika wadhifa wa juu kabisa ambayo uchunguzi wake ulidumu kwa zaidi ya miaka 3 na kufichua mfumo wa rushwa ya kiwango cha juu kati ya wafanyabiashara na serikali.

Jaji Sergio Moro alimtia hatiani Lula mwenye umri wa miaka 71 kwa kosa la kupokea reais milioni 3.7 (sawa na dola milioni 1.2) ambayo ni rushwa kutoka kampuni ya uhandisi ya OAS SA, kiwango ambacho waendesha mashitaka walisema kuwa kampuni hiyo ilikitumia kumjengea Lula nyumba ya ufukweni ili aisaidie kushinda zabuni za mikataba na kampuni ya mafuta ya serikali ya Petroleo Brasileiro.

Mawakili wa serikali wamemtuhumu Lula, ambaye ni rais wa kwanza wan chi hiyo kutoka jamii ya wafanyakazi kuanzia mwaka 2003 mpaka 2011, kwamba alisanifu mpango wa ufisadi wa muda mrefu ambao uligunduliwa katika uchunguzi maarufu wa kampuni ya Petrobras.

Jopo la wanasheria wa Lula lilisema katika taarifa yake ya mtandaoni kuwa hana hatia na kwamba watakata rufaa.

"Kwa zaidi ya miaka mitatu, Lula amekuwa mhanga wa uchunguzi ulichochewa kisiasa," waliandika. “Hakuna ushahidi wa kuaminika uliotolewa kumuweka hatiani, na ushahidi lukuki wa kuthibtisha kuwa hana hatia ulipuuzwa."

Wakili wa Lula, Cristiano Martins, amemtuhumu mara kwa mara jaji Moro kwamba ana upendeleo dhidi ya mteja wake, tuhuma ambazo Moro amezikanusha vikali.

Moro alieleza katika hukumu yake kuwa hakutumia hisia zake binafsi kutoa hukumu, tofauti kabisa na tuhuma alizoelekezewa.

"Ni jambo la kuhuzunisha kwamba rais wa jamhuri anahukumiwa kwa kufanya uhalifu,” Moro alisema. “Hata uwe na cheo gani, hakuna aliye juu ya sharia.”

Sarafu ya Brazil iliimarika kufuatia uamuzi huo na kufikia kiwango chake cha juu kabisa ndani ya miezi miwili. Orodha ya soko la hisa imepanda kwa kiwango kikubwa. Wawekezaji wana wasiwasi kwamba utawala mwingine wa Lula unamaanisha kurejea kwa sera za uchumi unaohodhiwa zaidi na serikali na sera ambazo sio rafiki kwa biashara.

"PIGO KWA SIASA ZA MRENGO WA KUSHOTO"

Iwapo mahakama ya rufaa itakubaliana na hukumu hiyo, basi Lula hatoruhusiwa kushika wadhifa wa umma, rufaa ambayo inatarajiwa kuchukua angalau miezi 8 kabla ya hukumu.

Wachambuzi wa mambo wanasema kuwa asipogombea, chama cha mrengo wa kushoto nchini humo kitakuwa katika wakati mgumu sana kwa kulazimika kujijenga upya na angalau kutafuta kiongozi atakayeweza kuibuka na kujitoka kwenye kivuli ambacho Lula amekiweka kwenye siasa za nchi hiyo kwa miongo mitatu.

"Kukosekana kwa Lula kunaibua shimo katika medani za kisiasa na kutengeneza ombwe kubwa la uongozi kwa chama cha mrengo wa kushoto," alisema Claudio Couto ambaye ni mwanasayansi wa siasa kutoka Chuo Kikuu cha Getulio Vargas Foundation. "Sasa hivi tumeingia katika hali ya mvutano mkubwa wa kisiasa ambao ni zaidi ya ghasia ambazo tulikuwa nazo mwaka jana.”

Couto anasema kuwa anatarajia mahakama ya rufaa itapitisha hukumu hiyo. Iwapo itakuwa hivyo basi itakifanya kinyang’anyiro cha urais mwaka 2018 kuwa wazi na kuibuka uwezekano wa mgombea mgeni kwenye ulingo wa siasa kuibua mshindi, hasa ikichukuliwa kwamba wagombea wengi nao wanazungukwa na wingu la uchunguzi dhidi ya ufisadi.

MAMBO KWENDA MRAMA?

Awamu mbili za utawala wa Lula zilikuwa maarufu kwa ustawi wa bidhaa na hivyo kuufanya uchumi wa Brazil kwa muda kuwa miongoni mwa uchumi unaokuwa kwa kasi zaidi ulimwneguni. Sera zake za mambo ya nje, kuiunganisha Brazil na mataifa mengine makubwa yanayoendelea, kuliinua nchi hiyo kwenye jukwaa kubwa la kimataifa.

Katika hali ya kutaka kupanda chati zaidi, Lula alipuuza ushawishi wake wa kiuchumi na kisiasa kwenye ukanda wa kaskazini na kuanza kujihusisha katika matatizo ya kimataifa, kama vile suala la amani ya Mashariki ya Kati na kujiingiza kwenye kadhia ya programu ya nyuklia ya Iran.

Rais wa zamani wa Marekani, Barack Obama, wakati fulani alimuelezea kama mwanasiasa mashuhuri zaidi duniani.

Baada ya kuondoka ofisini na kufanikiwa kumuweka madarakani mrithi wake aliyemteua mwenyewe, Dilma Rousseff, uchumi wa Brazil ulitetereka, ambapo sasa taifa hilo linaanza kutoka kwenye mdororo mbaya zaidi kuwahi kuikumba.

Rousseff aliondolewa madarakani kwa kura ya bunge mwaka jana kutokana na kukiuka taratibu za kibajeti. Yeye na wafuasi wake wanasema kuwa kuondolewa kwake yalikuwa ‘mapinduzi’ yaliyoratibiwa na makamu wake ambaye kwa sasa ni rais wa nchi hiyo, Michel Temer, ambaye yeye mwenyewe anakabiliwa na tuhuma za ufisadi.

Wakati wa kesi yake, Lula alitoa utetezi mkali uliodumu kwa muda wa saa tano akidai kuwa hana hatia na kwamba kesi hiyo ilichochewa kisiasa na sio matumizi mabaya ya fedha za umma.

"Lakini kinachotokea sasa hakitanikatisha tamaa, badala yake kitanipa hamasa ya kujitokeza na kusema zaidi," Lula alisema katika ushahidi wake. “Nitaendelea kupambana."

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.