LIPUMBA ATOA SOMO BUNGENI

Mchumi aliyebobea Profesa Ibrahimu Lipumba, amepinga kauli za kuwa Serikali tatu ina gharama na badala yake akasema wanaopendekeza hizo hawana nia njema na Tanzania.

Hata hivyo, alitoa pendekezo ndani ya Bunge kuwa hakuna haja ya kuendelea kujadili rasimu nzima ya katiba kwani kukataa Serikali tatu ni sawa na kuipinga rasimu yote ambayo imeundwa kwa mfumo wa Serikali tatu.

Profesa Lipumba ambaye ni Mjumbe wa bunge la Katiba, alitoa kauli hiyo juzi aliposimama kutoa maoni ya wajumbe wachache katika kamati namba tisa ambapo alionyesha shaka ya uwezo wa kufikiri wa wajumbe wengi wanaopinga maoni ya wananchi kuhusu Serikali tatu.

Hoja za Lipumba zilionekana kuvuta zaidi hisia za wajumbe na kushangilia ndani na nje ya ukumbi wa bunge kitendo kilichoonekana kuwakera wajumbe ambao ni kundi la wengi.

“Kupendekeza Serikali mbili ni sawa na kuvuruga na kuwabeza wananchi katika maoni yao, sasa kuna haja gani ya kuendelea kujadili vitu hivyo kama si kupoteza muda wa bure hapa,”alisema Lipumba.

Alitolea mfano wa wasomi wengi ambao wakati wote wamekuwa wakipendekeza mfumo wa Serikali tatu, lakini cha ajabu wakiingia bungeni wanapinga jambo ambalo alisema lazima washtakiwe kwa wananchi.

Lipumba alisema wakati wa tume ya Warioba, hata Ofisi ya Waziri Mkuu ilipendekeza mfumo wa Serikali tatu lakini akasikitishwa ndani ya kamati yao bado viongozi wengine kutoka katika ofisi hiyo wamepinga.

“Haya ni mambo ya ajabu sana, hivi nani kawashughulikia huko, mbona awali ofisi ya Waziri Mkuu ilikubali serikali tatu leo mnapinga ina maana mnampinga kiongozi wenu,” alihoji Lipumba na kuongeza.

“Hata nyinyi wajumbe kutoka Baraza la Wawakilishi, kule Zanzibar mlitoa maoni ya kuunga mkono Serikali tatu leo hii mnakataa, sasa niwaulize hivi mnaweza kuthubutu kusimama pale Kibandamaiti na kuzungumzia Serikali mbili, nani atawaelewa.”

Alisema wanaosema Serikali tatu zina gharama ni wale ambao wanataka rasilimali za Tanzania ziendelee kutafunwa na wachache kwa kupora kama ambavyo wamekuwa wakifanya wakati wote.

Alitolewa mfano kuwa fedha nyingi zinazotengwa na bunge hazifanyi kazi iliyokusudiwa na badala yake zinaishia mikononi mwa wajanja wachache ambao ndio wanaopigania suala la muundo wa serikali mbili.

Alizitaja Wizara Mambo ya Nje kuwa katika bajeti iliyopitishwa na bunge mwaka jana, matumizi yake yalizidi hadi kufikia asilimia 146, Wizara ya Tamisemi asilimia 240 na Ulinzi zaidi ya asilimia 160.

“Hapo ndipo tunapolalamikia, miradi mingi ya wananchi fedha haziendi huko wananchi wanalia wakati kuna maeneo ambayo yanatumia ovyo pesa za walipa kodi bila ya utaratibu, tunataka katiba yenye meno hii imeshindwa kwa muda wote wa miaka 50 na haitaweza tena.”

CHANZO: Mwananchi

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.