MGOMO WA MADAKTARI WANUKIA NCHINI LIBERIA

 

Waofisa wa Liberia wanawasihi manesi na madaktari wasitishe mpango wao wa kufanya mgomo nchi nzima katika kipindi hiki ambacho mlipuko wa maradhi hatari ya Ebola unaendelea kulitikisa eneo la Afrika Magharibi.

Chama cha Madaktari nchini humo kinataka nyongeza ya fedha ya mazingira hatarishi wanayolipwa wale wanaowatibu wagonjwa wa Ebola.

Naibu waziri wa afya nchini Liberia, Tolbert Nyenswah, amesema kuwa mgomo huo utakuwa na athari mbaya kwa wagonjwa na utaathiri maendeleo yaliyokwishapatikana katika mapambano dhidi ya maradhi hayo.

Serikali inasema kuwa ukubwa wa mlipuko wa maradhi hayo unaifanya ishindwe kulipa kiasi cha fedha walichokubaliana awali.

Kwa sasa fedha ya mazingira hatarishi ni chini ya dola 500 kwa mwezi, nje ya mshahara wa kawaida ambao ni kati ya dola 200-300. Madaktari wanataka fedha hiyo iongezwe mpaka kufikia dola 700 kwa mwezi.

Madaktari hao pia wanataka vifaa vya kujikinga dhidi ya maambukizi na wapewe bima.

Asilimia tisini na tano ya wenzao wameshapoteza maisha kutokana na Ebola. Liberia ni miongoni mwa nchi zilizoathirika vibaya sana na maradhi hayo.

Mpaka sasa zaidi ya watu 4,000 wameshapoteza maisha katika mlipuko huo.

Kituo kipya cha Umoja wa Mataifa kwa ajili ya kuratibu mapambano dhidi ya maradhi hayo kimewekwa nchini Ghana.

Wafanyakazi wa Umoja wa Mataifa wamepelekwa nchini Ghana. Ghana yenyewe bado haijaripoti visa vyovyote vya maradhi hayo.

Mlipuko huo umeleta athari kubwa kwa nchi zilizoathirika zaidi ambazo ni Liberia, Sierra Leone na Guinea ambako chakula kimekuwa adimu kutokana na ugavi kutetereka.

Nchini Liberia, uchaguzi umeakhirishwa kwa sababu mikusanyiko ya watu kwenye vituo vya kupigia kura inaweza kuhatarisha maisha.

Share on Facebook Share on Twitter Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.