MLIPUKO WA BOMU WAUA KADHAA MJINI MOGADISHU

MOGADISHU, SOMALIA – Mlipuko mkubwa wa bomu lililotegwa kwenye gari na ambao ulilenga kituo cha ukaguzi jirani na Makao ya Rais katika mji mkuu wa Somalia umewaua watu wasiopungua watano na kuwajeruhi wengine kadhaa.

Maafisa wa usalama waliokuwa kwenye eneo la tukio wameliambia shirika la habari la Reuters kuwa kituo hicho cha ukaguzi kilishambuliwa na bomu lililotengwa kwenye gari ambayo ilikuwa ikiendeshwa na mshambuliaji wa kujitoa mhanga na kusababisha mlipuko nje ya ukumbi mmoja wa mikutano.

"Kwa uchache watu watano wameuawa wakiwemo maafisa wa usalama na wengine 10 wamejeruhiwa,” amesema Abdifatah Omar Halane, msemaji serikali ya Mogadishu.

Afisa wa polisi bwana Mohamed Hussein amesema: "Idadi ya vifo inaweza kuongezeka. Wakati wa mlipuko kuna watembea kwa miguu waliokuwa wakipita mahala hapo."

Mtangazaji wa Radio Kulmiye, Farhio Hussein, ameliambia shirika la habari la Al Jazeera kuwa waathirika ni pamoja na askari wa serikali waliokuwa kwenye kituo hicho cha ukaguzi katika eneo la katikati ya mji wa Mogadishu. Eneo la mlipuko lilikuwa karibu na lango la pili la Makazi ya Rais.

"Nilikuwa kwenye kituo cha redio nikasikia mlipuko mkubwa. Nilipofungua dirisha niliona moshi mkubwa. Nilihesabu miili mitano ikiwa imelala katika eneo hilo,” alisema Hussein.

Hakuna kundi lililodai kuhusika na shambulizi hilo.

Kundi la Al-Shabab lenye uhusiano na Al-Qaeda, ambalo limekuwa likipambana kuiondosha serikali ya Somalia, limekuwa likilaumiwa kwa mlolongo wa mashambulizi katika jiji la Mogadishu.  

Mwaka 2011 majeshi ya Umoja wa Afrika yalilifurusha kundi hilo katika mji wa Mogadishu lakini bado linadhibiti maeneo mbalimbali ya mikoani na kufanya mashambulizi dhidi ya maeneo ya serikali, jeshi na ya umma katika jiji hilo na katika miji mingine.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.