ERDOGAN KUKUTANA NA PUTIN MJINI SAN PETERSBURG LEO

Rais Erdogan (kulia) alipokutana na Rais Putin (kushoto) pembezoni mwa kilele cha mkutano wa G20 uliofanyika mjini Antalya, Uturuki mwezi Novemba mwaka jana.

RAIS wa Uturuki, Recep Tayyip Erdogan anatarajiwa leo kukutana na Rais wa Urusi, Vladmir Putin mjini San Petersburg katika ziara yake ya kwanza nje ya nchi baada ya jaribio la mapinduzi lililoshindwa.

Mkutano huo utakuwa wa kwanza unaowakutanisha marais hao wawili baada ya mgogoro wa kidiplomasia uliozikumba nchi hizo mbili kufuatia ndege mbili za Uturuki kuiangusha ndege ya kivita ya Urusi iliyoingia katika anga ya Uturuki mwezi Novemba mwaka jana.

Katika mahojiano na shirika la habari la Urusi, Tas, Rais Erdogan amesema kuwa Urusi ni miongoni mwa pande muhimu sana katika mchakato wa amani ya Syria na kuelezea matumaini yake kuwa mwenzake wa Urusi ataona umuhimu wa kuisaidia Uturuki baada ya mapinduzi ya kijeshi yaliyofeli.

Aidha, Rais huyo wa Uturuki ameelezea utayari wake wa kuondosha mtanziko katika uhusiano wake na Urusi kuhusu ujenzi wa vinu vya nyuklia, na kusema kuwa anataka kurejesha uhusiano imara kati ya Ankara na Moscow kwa kuanza ukurasa mweupe.

Amesema kuwa mkutano wake na Putin utafungua ukurasa mpya katika uhusiano baina ya mataifa hayo katika nyanja za kisiasa, kijeshi, kiuchumi na kiutamaduni pamoja na “mambo ambayo mihimili hiyo miwili ya kieneo inaweza kuyafanya”.

Aidha, Erdogan amekanusha madai kwamba Urusi iliitarifu mapema Uturuki juu ya mpango wa mtandao wa Fethullah Gulen kutaka kufanya mapinduzi nchini mwake, akisema “Mimi ndiye mtu wa kwanza ninayepaswa kulijua hilo, lakini sikupata taarifa yoyote kutoka vyombo vya upelelzi wala kutoka upande wowote ule.”

Akielezea kuhusu ziara hii, mkuu wa muungano wa upinzani nchini Syria, Anas Abdeh amesema kuwa anatarajia kwamba ziara ya Erdogan nchini Urusi itakuwa “chanya” na itasaidia kufikisha “ujumbe wa wazi” kwa Rais Putin kuhusu mgogoro wa Syria.

Aidha, amesema kuwa Rais wa Uturuki ni mshirika mkuu wa taifa la Syria na ana fursa ya kutoa maoni na mapendekezo mbalimbali na kusisitiza kwamba Uturuki imewahakikishia kuwa haitabadili msimamo wake kuhusu mgogoro wa Syria baada ya mapinduzi ya kijeshi yaliyofeli.

Anas ameonesha matumaini yake kwamba Rais Erdogan atautaka upande wa Urusi kuacha kuwalenga raia wa kawaida katika mashambulizi yake na kujielekeza kwenye mchakato wa kisiasa ambao wananchi wa Syria ndio watakaokuwa na uamuzi kupitia “malengo ya mapinduzi” ambayo ni kuiunganisha Syria, kuondoka madarakani Rais Bashar Al-Assad na kujenga mfumo jumuishi wa kisiasa, wa kiraia na wa kidemokrasia.

Ungana nasi kupitia WhatsApp: +255 712 566 595

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.