WANAWAKE WA KISAUDI WAPINGA MARUFUKU YA KUTORUHUSIWA KUENDESHA GARI

WANAHARAKATI wanawake nchini Saudi Arabia wameweka picha na video mbalimbali kwenye mtandao wa intaneti zikiwaonesha wakiendesha magari, ikiwa ni hatua ya kupinga marufuku ya wanawake kutoendesha magari iliyowekwa na utawala wa nchi hiyo.

Picha na video hizo zilizoanza kuwekwa jana Alhamisi, ziliwaonesha wanawake mbalimbali wa Kisaudi wakiendesha magari katika mji mkuu wa nchi hiyo, Riyadh.

Mwanaharakati mmoja wa Kisaudi, aliyezungumza kwa sharti la kutotajwa jina, alisema kuwa hatua hiyo ni sehemu ya kampeni yenye hatua mbili inayolenga kupinga marufuku iliyowekwa dhidi ya wanawake kutoendesha gari. Katika hatua ya pili, wanawake wenye leseni za udereva za kimataifa watatakiwa kuendesha magari Oktoba 26.

“Kuendesha ukiwa na leseni haipaswi kuchukuliwa kuwa ni kinyume na sheria,” alisema na kuongeza kuwa, “mamlaka, nchi, fikra za watu zimebadilika.”

Kampeni hiyo ilizinduliwa baada ya Baraza la Shura la Saudi Arabia kulikataa ombi la pamoja lililotolewa na wanabaraza wa kike waliotaka kujadiliwa suala la kuiondosha marufuku hiyo.

Uamuzi huo wa baraza ulikuja licha ya kuongezeka kwa taarifa na ripoti mbalimbali za wanawake walioamua kuendesha magari katika kuipinga marufuku hiyo.

Baadaye mwezi huu, wanaharakati wa Kisaudi wanapanga kufanya maandamano nchi nzima kupinga marufuku hiyo.

Saudi Arabia ndiyo nchi pekee duniani ambayo wanawake wamepigwa marufuku kuendesha gari. Mwanamke akiendesha gari anaweza kukamatwa, akapelekwa mahakamani na hata kuchapwa viboko.

Wanaounga mkono marufuku hiyo wanasema kuwa kuwaruhusu wanawake kuendesha magari ni tishio kwa maadili ya umma na kunawahamasisha na kuwashawishi kuchanganyika sana na wanaume hadharani.

Mwaka 2011, wanawake kadhaa walishiriki katika kampeni kama hiyo, waliyoiita: NI HAKI YANGU KUENDESHA, wakipinga marufuku hiyo. Waliweka picha na video mbalimbali mtandaoni zilizowaonesha wakiwa wanaendesha.

Muda mfupi baadaye polisi waliwakamata baadhi ya wanawake waliokuwa wakiendesha; wawili miongoni mwao walishitakiwa. Hata hivyo, waliachiwa huru baada ya kulazimishwa kula kiapo cha kutoipinga tena marufuku hiyo.

About Unknown

This is a short description in the author block about the author. You edit it by entering text in the "Biographical Info" field in the user admin panel.