MUSHARRAF APEWA DHAMANA

 

MAHAKAMA kuu nchini Pakistan imempa dhamana kiongozi wa zamani wa nchi hiyo, Pervez Musharraf, katika kesi inayomkabili ya mauaji ya kiongozi mmoja wa upinzani wa jimbo la Balochistan.

Wakili wa Musharraf anasema kuwa hatua hiyo itapelekea kuachiwa huru kutoka katika kizuizi cha nyumbani.

"Pervez Musharraf yuko huru sasa baada ya kupata dhamana katika kesi ya Bugti,” alinukuliwa wakili Qamar Afzal.

Musharraf alikuwa rais wa Pakistan pindi Akbar Bugti, kiongozi mkuu katika jimbo la kusini magharibi la Balochistan, alipofariki katika shambulizi la jeshi Agosti 2006.

Mpaka sasa Musharraf ameshapewa dhamana tatu, ikiwemo ile ya mauaji ya waziri mkuu wa zamani, Benazir Bhutto.

Kwa sasa yupo katika kizuizi cha nyumbani mjini Islamabad kuhusiana na kesi kadhaa zinazomkabili, ikiwemo hiyo ya Bhutto.

Bhutto aliuawa katika shambulizi la bomu Desemba 27, 2007, wakati akitoka kwenye mkutano wa kampeni katika mji wa Rawalpindi. Musharraf anatuhumiwa kwa kushindwa kumpa Bhutto ulinzi wa kutosha baada ya kutoka uhamishoni Oktoba 18, 2007.

Vilevile anakabiliwa na mashitaka ya kuwaweka katika kizuizi cha nyumbani majaji kinyume cha sheria baada ya kumtimua Jaji Mkuu Iftikhar Muhammad Chaudhry, akatangaza hali ya hatari, na kusitisha matumizi ya katiba, wakati akijaribu kuukandamiza mhimili wa mahakama mwaka 2007.

Aidha, Musharraf anatuhumiwa kukiuika katiba kwa kutoa amri ya kuwakamata majaji na kuwaweka kizuizini.

Mtawala huyo wa zamani wa kijeshi anakanusha tuhuma hizo na kudai kuwa zinachochewa kisiasa.

Jenerali huyo wa zamani, aliyeingia madarakani katika mapinduzi yasiyokuwa na umwagaji damu Oktoba 1999, aliachia madaraka ya urais Agosti 2008, miezi sita baada ya waitifaki na washirika wake kushindwa katika uchaguzi wa bunge wa Februari 2008 na serikali mpya kutishia kumuangusha. Mwaka mmoja baadaye akaondoka nchini na kukimbilia nje ya nchi.

Mwezi Machi 2013, Musharraf alirejea Pakistan baada ya takriban miaka minne ya kukaa uhamishoni mjini London na Dubai kwa leo la kugombea katika uchaguzi wa bunge uliofanyika mwezi Mei. Lakini alizuiliwa kugombea kutokana na mashitaka na tuhuma mbalimbali zinazomkabili kutokana na makosa aliyoyafanya wakati wa utawala wake. 

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.