CHAMA TAWALA GUINEA CHASHINDA UCHAGUZI WA BUNGE

Rais wa Guinea Alpha Conde

CHAMA tawala nchini Guinea kimeshinda katika uchaguzi wa bunge uliofanyika Septemba 28.

Tumie ya Uchaguzi nchini humo jana Ijumaa Usiku ilitoa taarifa na kusema kuwa chama tawala nchini humo cha RPG (Rally of the Guinean People) kinachoongozwa na Rais Alpha Conde kilishinda viti 53 huku washirika wao kikishinda viti 7 na hivyo kuzoa viti 60 katika ya viti 114 vya bunge.

Chama cha upinzani cha UFDG, kinachoongozwa na Cellou Dalein Diallo, kilipata viti 37 na chama cha Waziri mkuu wa zamani Sidya Toure cha UFR kilishinda viti 10. Viti vilivyobaki vilichukuliwa na vyama vidogo vidogo.

Wapinzani wameyakataa matokeo hayo na kusema kuwa yamepikwa ili kukisaidia chama tawala.

"Hatutayatambua matokeo, ambayo hayaendani na kura za wananchi,” alisema msemaji wa muungano wa upinzani, Sydia Toure, kama alivyonukuliwa na AFP.

Oktoba 4, wapinzani nchini humo walitoa wito wa kubatilishwa kwa matokeo ya uchaguzi wa bunge kwa madai ya kugubikwa na wizi na ukiukwaji wa taratibu mbalimbali za uchaguzi.

"Upinzani unataka kubatilishwa kwa matokeo kwa sababu wizi wa kura ulikuwa mkubwa sana,” vilisema vyama vya upinzani katika tamko la pamoja.

Vyama hivyo vilimshutumu Conde na chama chake “kuchelewesha amtoke” ya uchaguzi huo kwa lengo la “kumpa rais ushindi ambao hakustahili.”

"Licha ya maonyo ya mara kwa mara, upinzani unashuhudia mamlaka na CENI (Tume Huru ya Uchaguzi) wakiendelea kuchapisha matokeo yasiyoakisi kwa vyoyote uhalisia wa kura,” ilisema taarifa hiyo.

Aidha, wapinzani waliwataka wafuasi wao kuungana na kuwa tayari kwa maandamano yatakayofanyika ndani ya siku kadhaa zijazo.

"Iwapo matakwa haya ya kubatilishwa matokeo hayatazingatiwa, upinzani utalazimika kutumia njia zote halali za kuyapinga ikiwemo maandamano ya umma,” alisema kiongozi mwingine wa upinzani, Aboubacar Sylla.

Uchaguzi ulifanyika miezi kadhaa baada ya kuakhirishwa kufuatia machafuko yaliyoua watu kadhaa.

Mnamo Septemba 23, makabiliano baina ya wapinzani na polisi yaligharimu maisha ya askari mmoja huku zaidi ya watu 50 kujeruhiwa katika mji mkuu wa nchi hiyo, Conakry.

Guinea ni miongoni mwa nchi masikini zaidi katika ukanda wa Afrika Magharibi licha ya kuwa na rasilimali mbalimbali kama vile madini na kadhalika.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.