MAHAKAMA YAMUONDOA MADARAKANI WAZIRI MKUU

Waziri Mkuu wa Thailand  Yingluck Shinawatra (katikati) akitoka nje ya Mahakama ya Katiba mjini  Bangkok, jana Mei  6, 2014 alikokwenda kutoa utetezi wake.

MAHAKAMA ya Katiba nchini Thailand imemuondosha madarakani Waziri Mkuu wa nchi hiyo, Bi. Yingluck Shinawatra kwa kosa la matumizi mabaya ya madaraka.

Mahakama hiyo imetoa hukumu leo kuwa Yingluck alitenda kinyume na sheria alipomhamisha Mkuu wa Baraza la Usalama la Taifa Thawil Pliensri kumpeleka kwenye wadhifa mwingine mwaka 2011.

Katika hukumu hiyo iliyokuwa ikitangazwa moja kwa moja katika vituo vya televisheni, jaji Charoon Intachan alisema: “Wadhifa wake wa uwaziri mkuu umekoma… Yingluck hawezi tena kuendelea na wadhifa wake kama Waziri Mkuu.”

Hukumu hiyo imekuja siku moja baada ya Yingluck kufika mahakamani na kupinga mashitaka yote yaliyofikishwa mbele ya mahakama hiyo.

“Ninazikataa tuhuma hizi… sikuvunja sheria, sikuwa na maslahi yoyote katika uteuzi huo,” aliiambia mahakama hapo jana.

Mawaziri kadhaa katika baraza lake wanaweza kuondolewa katika nyadhifa zao kwa tuhuma za kuunga mkono uamuzi wa Yingluck wa kumhamisha Pliensri.

Wapinzani wanasema kuwa uhamisho wa Pliensri ulipangwa ili kukinufaisha chama cha waziri mkuu kijulikanacho kwa jina la  Puea Thai Party (PTP). Alirejeshwa katika wadhifa wake mapema mwaka huu.

Kwa mujibu wa sheria za Thailand, naibu waziri mkuu anaweza kukaimu nafasi ya waziri mkuu mpaka serikali mpya itakapoundwa baada ya uchaguzi mwingine.

Hata hivyo, kuna uwezekano wa mahakama kuwatimua mawaziri wengine, jambo ambalo litaifanya nchi kutokuwa na baraza la mawaziri na bunge ambalo lilivunjwa mapema mwaka huu ili kupisha uchaguzi ambao baadae ulibatilishwa.

Maandamano dhidi ya serikali yalizuka baada ya Oktoba mwaka jana serikali kupeleka bungeni muswada ambao ungetoa msamaha kwa kaka wa Yingluck na ambaye ni Waziri Mkuu wa zamani wa nchi hiyo, Thaksin Shinawatra, na kumuandalia mazingira ya kurejea nchini Thailand. Zaidi ya watu 20 waliuawa katika maandamano hayo.

Wapinzani wanamuona Yingluck kama kibaraka anayetumiwa na kaka yake, ambaye aliondolewa madarakani katika mapinduzi ya mwaka 2006. Waziri Mkuu huyo wa zamani amekuwa akiishi uhamishoni tangu mwaka 2008 kwa kukwepa adhabu ya kifungo cha miaka miwili jela aliyohukumiwa na mahakama ya nchi hiyo.

Share on Google Plus

About www.habarika24.blogspots.com

This is a short description in the author block about the author. You edit it by entering text in the "Biographical Info" field in the user admin panel.