UKRAINE: TUKO TAYARI KUPAMBANA NA URUSI

Waziri wa Mambo ya Nje wa Ukraine Andriy Deshchytsia

Kaimu Waziri wa  mambo ya nje wa Ukraine  Andriy Deshchytsia amesema kuwa nchi yake iko tayari kupambana na Urusi iwapo Urusi itapeleka vikosi vyake nchini humo.

Shirika la habari la Associated Press limemnukuu waziri huyo akisema kuwa wananchi na jeshi la Ukraine wako tayari kukabiliana na Urusi, kuitetea ardhi na kuilinda nchi yao.

Kauli ya Waziri huyo ni radiamali dhidi ya mpango wa Urusi kufanya mazoezi ya kijeshi kwenye mpaka wa Ukraine baada ya waandamanaji wapatao 5 wanaoiunga mkono Urusi kuuawa mashariki mwa Ukraine.

Deshchytsia amesema kuwa mazoezi hayo yanazorotesha hali ya mambo katika eneo hilo na kwamba sasa wako tayari kuikabili Urusi moja kwa moja iwapo itaingia Ukraine.

Aidha, Deshchytsia aliitolea mwito Jumuiya ya Ulaya kuiwekea Urusi vikwazo vipya.

Leo Ukraine imetangaza kuanzisha awamu ya pili ya operesheni maalumu kuwaondosha wanaharakati wanaoiunga mkono Urusi katika miji ya mashariki mwa nchi hiyo.

Taarifa kutoka mjini Kiev zinasema kuwa awamu hiyo imeanza katika mji wa  Slavyansk, ambao unashikiliwa na waandamanaji.

Awamu ya kwanza ilianza jana, ambapo vikosi vya nchi hiyo viliingia katika mji huo na waandamanaji 5 wanaiounga mkono Urusi waliuawa.

Waziri wa Mambo ya Nje wa Urusi Sergey Lavrov ameilaana vikali operesheni hiyo na kuiita kuwa ni “jinai kubwa” akisema kuwa serikali ya Ukraine imeanzisha vita dhidi ya wananchi wake yenyewe.

Mnamo Aprili 17, serikali ya mpito ya Ukraine pamoja na Marekani, Urusi na Jumuiya ya Ulaya zilifikia makubaliano mjini Geneva Uswiss, ambayo yalizitaka pande zote kutatua mzozo unaoendelea mashariki mwa Ukraine, ambapo waandamanaji wameendelea kuyakalia majengo katika miji na majiji kadhaa.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.