WAZIRI MKUU WA LIBYA AACHIWA HURU BAADA YA KUTEKWA

 

WAZIRI Mkuu wa Libya, Ali Zeidan, ameripotiwa kuachiwa saa kadhaa baada ya kutekwa na watu wenye silaha katika hoteli moja katika mji mkuu wa nchi hiyo, Tripoli.

Waziri wa Mambo ya nje wa Libya, Mohammed Abdelaziz amethibitisha kuwa Zeidan ameachiwa huru.

Hata hivyo, waziri huyo alisema kuwa mpaka sasa hawana taarifa za kina za mazingira ya kuachiwa kwake.

Taarifa hiyo inakuja saa chache baada ya vyanzo kutoka serikali ya Libya kusema kuwa kundi moja la waasi wa zamani ndilo lililohusika na kumteka na kumpeleka kusikojulikana.

Serikali ya Libya ililaani kitendo cha kukamatwa kwa Waziri Mkuu na kukiita kuwa ni “kitendo cha kihalifu.”

Kundi moja la waasi wa zamani linalojulikana kama Operations Cell of Revolutionaries (OCR) lilidai kuhusika na tukio hilo.

Kundi hilo liliandika katika ukurasa wake wa  Facebook kuwa lilimkamata Zeidan kwa amri ya waendesha mashitaka, lakini ofisi ya mwendesha mashitaka ilikanusha kutoa kibali cha kukamatwa kwa Zeidan.

Utekwaji huo umefanywa siku kadhaa baada ya vikosi vya Marekani kufanya shambulizi la kushitukiza mjini Tripoli na kumkamata mtu anayedaiwa kuwa kiongozi wa al-Qaeda nchini humo, Abu Anas al-Libi.

Al-Libi, mwenye umri wa miaka 49, anaripotiwa kushikiliwa na kuhojiwa katika meli ya kivita ya Marekani, USS San Antonio, ambayo imeweka nanga baharini.

Serikali ya Libya inalichukuliwa shambulizi hilo la Marekani kama utekaji nyara wa raia wa Libya, na wamemhoji balozi wa Marekani nchini humo kuhusu hatua hiyo.

Mnamo Oktoba 8, Zeidan aliwaambia waandishi wa habari mjini Tripoli kuwa, uhusiano wetu na Marekani ni muhimu, na tunalizingatia hilo, lakini pia tunawajali raia wetu, na hilo ndio jukumu letu.”

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.