WATUHUMIWA UGAIDI MTWARA WAENDELEA KUKAA RUMANDE

WATUHUMIWA 11 ambao walikamatwa wakifanya mafunzo yanayodaiwa kuwa ya kigaidi kwa kutumia CD za Al Shabaab na Al Qaeda katika msitu wa Makoloanga wilayani Nanyumbu, Mkoa wa Mtwara, jana walikwama kufikishwa mahakamani kutokana na taratibu za kuwahamishia mkoani kutokamilika.

Akizungumza na waandishi wa habari, Kamanda wa Polisi wa Mkoa wa Mtwara, Zelothe Stephen, alisema kuwa wamewarudisha mahabusu wilayani Nanyumbu watuhumiwa hao.

“Leo tulitarajia kuwafikisha watuhumiwa hawa wa ugaidi katika mahakama ya wilaya, lakini kutokana na kutokamilika mazungumzo ya kuwahamishia hapa mkoani, tumekwama kuwafikisha mahakamani. Mazungumzo yatakapokamilika watarudishwa tena hapa mkoani,” alisema.

Kamanda aliwataka wananchi wawe watulivu katika kipindi hiki kwani bado uchunguzi unaendelea na mambo haya hayawezi kuisha kienyeji.

Watuhumiwa hao waliokamatwa wakifanya mafunzo ya hayo ni kiongozi wao, Mohamed Makande (39) mkazi wa Kijiji cha Sengenya, Hassan Omari (39) mkazi wa Kijiji cha Nalunyu na Rashid Ismail (27).

Wengine ni Abdala Yusufu (32), Salum Bakari (38), Fadhal Rajabu (20), Abbas Muhidin (32), Ismail Chande (18), Saidi Mawazo (21), Issa Abed (21) na Ramadhan Issa (26) wote wakazi wa kijiji cha Likokona, wilayani Nanyumbu.

Kundi hilo la watuhumiwa lilikamatwa na CD 25 zenye picha za mafunzo mbalimbali yakiwemo ya Al Shabab, mauaji ya Osama Bin Laden, Zinduka Zanzibar, kuandaa majeshi, mauaji ya Iddi Amini na Mogadishu sniper.

Pamoja na CD hizo pia wanadaiwa kukamatwa na vifaa vingine ambavyo ni pamoja na DVD player moja solar panel ya watt 30, mapanga, visu, betri moja ya pikipiki, vitabu mbalimbali vya Kiislamu na tochi.

Pia walikutwa na vifaa vya kupikia na kulia vikiwemo majiko, taa, baiskeli tatu ndoo za maji, unga wa mahindi kilo 50, mbaazi kilo 50, mfuko wa kijeshi wenye nembo ya nanga ya meli yenye mistari kulia na kushoto na nyoka katikati.

Kamanda Zelothe alisema kuwa watuhumiwa hao wamefikia 13 baada ya kukamatwa wengine wawili ambao majina yao hakuyataja kwa ajili ya upelelezi zaidi.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.