WATU 60 WAPOTEZA MAISHA HEKALUNI NCHINI INDIA

 

Watu sitini wamepoteza maisha kutokana na kukanyagana walipokuwa kwenye hekalu moja katika jimbo la kati la Madhya Pradesh nchini India.

Kwa mujibu wa polisi, tukio hilo limetokea leo kwenye daraja moja nje ya hekalu la madhehebu ya Kihindu, Wilaya ya Datia, katika jimbo la Madhya Pradesh.

“Watu sitini wamethibitishwa kupoteza maisha na idadi inaweza kuongezeka na kufikia 100”, alisema naibu wa Inspekta wa Polisi katika eneo hilo D.K. Arya.

Kwa mujibu wa Arya, watu walianza kukanyagana baada ya kuzagaa kwa taarifa kwamba daraja hilo linaweza kuanguka baada ya trekta kuingia mahali hapo.

“Watu wengi wanahofiwa kuwa waliangukia mtoni na hawajahesabiwa ili kujua idadi yao.”

Kwa mujibu wa taarifa mbalimbali kutoka eneo la tukio, zaidi ya watu 100 wamejeruhiwa.

Maofisa wanasema kuwa watu wapatao 20,000 walikuwa kwenye daraja hilo wakati wa mkanyagano, huku wengine 400,000 wakielezwa kuwa walikuwa ndani ya hekalu au jirani na hekalu hilo linalopatikana kaskazini mwa mji mkuu wa jimbo hilo, Bhopal.

Umati huo ulikuwa umekusanyika kusherehekea na kuadhimisha sikukuu ya  Navaratri.  

Mwezi Februari, watu wapatao 40 walipoteza maisha katika mkanyagano wakati mahujaji wakirejea kutoka kwenye maadhimisho ya kidini ya sikukuu ya Kumbh Mela jirani na Mto Ganges.

Mwezi Januari 2011, zaidi ya watu 100 walipoteza maisha yao katika jimbo la  Kerala. Mahujaji wengine 224 walifariki mjini Jodhpur mwezi Septemba 2008.

Mara nyingi hutokea matukio ya kukanyagana katika mikusanyiko mbalimbali ya kidini nchini India, ambayo hupoteza maisha ya watu na kuwajeruhi wengine.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.