HATIMAYE SERIKALI YA MAREKANI YAFUNGULIWA

Bunge la Congress nchini Marekani limepitisha mpango wa muda mfupi wa kuifungua serikali na kuongeza uwezo wa nchi hiyo wa kukopa.

Muswada wenye kurasa 35, ambao utaongeza uwezo wa nchi hiyo kukopa mpaka Februari 7 na kufadhili shughuli za serikali mpaka Januari 17, ulikubaliwa na mabunge yote mawili, bunge la seneti na bunge la wawakilishi, muda mfupi kabla ya kumalizika kwa muda wa uwezo wa Marekani kukopa fedha na siku 16 baada ya serikali kufunga shughuli zake.

Bunge la seneti liliupitisha muswada huo kwa kura 81 dhidi ya 18 na bunge la Wawakilishi liliupitisha mpango huo uliosimamiwa na seneti kwa kura 285 dhidi ya 144.

Muswada huo umetumwa kwa Rais Obama ambaye ameahidi kuusaini mara moja pindi utakapowasili mezani kwake.

“Mpango huu utakapowasili mezani kwangu nitausaini mara moja na tutaifungua serikali mara moja, na tunaweza kuondoa hili wingu la mashaka na tabu kwenye shughuli zetu na wananchi wa Marekani,” alisema Obama wakati akisubiri Bunge kupitisha mpango huo.

Kwa kipindi cha siku kumi na sita kuanzia Oktoba 1, serikali ya Marekani ilisimamisha baadhi ya shughuli zake kwa sababu wabunge wa Democrat na Republican walishindwa kukubaliana kuhusu bajeti ambayo ingeifanya serikali iendelee kufanya kazi.

Msuguano mkubwa ulitokana na mpango wa Obama wa huduma nafuu za bima kwa wananchi wasiokuwa na bima, unaojulikana kama Obamacare, ambao wabunge wa Republican walitaka uondolewe au ucheleweshwe.

Wasiwasi mkubwa ulizidi kwamba mgogoro huo wa kisiasa nchini Marekani ungepelekea nchi hiyo kushindwa kuongeza uwezo wake wa kukopa jambo ambalo lingeifanya Marekani kushindwa kulipa madeni kwa mara kwanza katika historia ya nchi hiyo.

Spika wa Bunge la Wawakilishi John Boehner (M-Republican kutoka Ohio) na viongozi wengine wa chama hicho walikubali kushindwa saa chache baada ya Harry Reid na Mitch McConnell, ambao ni viongozi wabunge wengi na wabunge wachache katika bunge la Seneti, kutangaza vipengele vya mpango huo wa muda mfupi.

Hata hivyo, Boehner alisema kuwa wabunge wa Republican wataendelea na juhudi zao za kumlazimisha Obama kuondosha au kuchelewesha utekelezaji wa mpango wake wa bima kwa watu wa kipato cha chini.

Habari imeandaliwa na: Mzizima 24

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.