BIDHAA ZA 'KISHETANI' ZAPATIKANA KWENYE SHEHENA MOMBASA

 

SHEHENA ya kutisha yenye viungo vya mwili wa binadamu vilivyoundwa kwa plastiki, ambavyo inashukiwa vilinuiwa kutumiwa katika ibada za kishetani nchini Kenya ilinaswa Alhamisi katika Bandari ya Mombasa.

Vitu hivyo pia vinahusishwa na watu wenye siri, sherehe ya kuwakumbuka wafu ama vitu vinavyohitajika katika ukumbi wa michezo ya kuigiza.

Vitu hivyo ni pamoja na mafuvu ya vichwa, mikono na miguu, viganja, buibui wakubwa weusi, mawe ya kaburi, maiti na popo.

Afisa wa ngazi za juu wa Mamlaka ya Ushuru Kenya (KRA) alisema shehena hiyo ni mali ya “mwanasiasa maarufu sana” nchini Kenya .

Vilikuwa vimewekwa katika masanduku 10 makubwa ambayo hayakuwa na lebo yoyote.

Vitu hivyo vimegunduliwa huku kukiwa na hofu kwamba kuna vituo vya kuabudu shetani nchini Kenya vinavyoendelea kusajili wafuasi.

Inahofiwa kuwa kama vitu hivyo si vya mchezo wa kuigiza wa kutisha basi vina uhusiano na ibada za kishetani.

Vilikuwa miongoni mwa mali nyingine iliyosafirishwa kutoka China lakini havikuwa vimeorodheshwa kuwa sehemu ya bidhaa hizo zingine.

Kamishna Msaidizi wa KRA, Bi Fatuma Yusuf, alisema uchunguzi umeanzishwa kuhusiana na shehena hiyo ya kutisha na kwamba aliyekuwa ameiagiza atatajwa wakati ukifika.

Baadhi ya vitu hivyo vya plastiki vilionyesha jinsi binadamu anavyoweza kuteseka huku moja ikionyesha mwanamume akilia kwa maumivu huku akivamiwa na jeshi la panya.

Vingine zinaonyesha miguu ama mikono iliyokatwa huku ikifuja damu. Pia kuna vibao vilivyoandikwa kwa herufi nyekundu zinazotoka damu.

THUBUTU

Kimojawapo cha vibao hivyo kimeandikwa “Geuka” na kingine kimeandikwa “thubutu kuingia.”

Bi Yusuf alisema shehena hiyo, ambayo ilipatikana katika kituo cha mizigo cha Interpel Container Freight Station, karibu na mzunguko wa Changamwe, iliwasili Kenya Septemba 3.

“Kontena hiyo ya futi 40 iliwasili kutoka China kama bidhaa za kawaida za nyumbani. Lakini baada ya kuikagua kwa makini tumegundua viungo bandia vya mwili wa binadamu yakiwemo mafuvu ya vichwa, mikono na miguu miongoni mwa vitu vingine,” akasema Bi Yusuf.

Alisema bidhaa nyingine zilizokuwa ndani ya shehena hiyo na ambazo zilikuwa zimetajwa kuwa ndani ni mashine za kufua nguo, majiko ya kuoka, pazia, majiko ya gesi, vigae vya sakafuni na ukutani miongoni mwa bidhaa nyingine.

Bi Yusuf alisema viungo hivyo bandia vya mwili wa binadamu ndiyo vya kwanza vya aina yake kuletwa Kenya.

Msemaji ambaye hakutaka kutajwa jina alisema vitu hivyo viliagizwa kutumiwa katika hekalu za siri za kuabudu mashetani katika miji fulani nchini Kenya.

Alidai kuwa mahekalu hayo yapo Mombasa, Nairobi na Kisumu.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.