WAGOMBEA WAYAKATAA MATOKEO NCHINI AFGHANISTAN

Mkuu wa Tume Huru ya Uchaguzi nchini Afghanistan, Ahmad Yousuf Nuristani (katikati), akizungumza na waandishi wa habari mjini Kabul, Afghanistan, leo Aprili 14, 2014.

Wagombea 6 kati ya 8 wanaowania kiti cha urais wa Afghanistan wameyakataa matokeo ya awali yanayoonesha kuwa waziri wa zamani wa mambo ya nje wa nchi hiyo, Dkt Abdullah Abdullah, anaongoza.

Tume Huru ya UChaguzi ya nchi hiyo (IEC) imetangaza kuwa katika asilimia 10 za kura zilizohesabiwa, Dkt Abdullah alikuwa akiongoza kwa asilimia 41.9; Dkt Ashraf Ghani akiwa na asilimia 37.6 katika nafasi ya pili na Zalmai Rassoul akiwa na asilimia 9.8 katika nafasi ya tatu.

Tume hiyo imesema kuwa mgombea anayeongoza anaweza kubadilika kadiri kura zinavyoendelea kuhesabiwa.

Kufuatia tangazo hilo, wagombea hao waliyakataa matokeo na kutaka ufanyike uchunguzi wa tuhuma za wizi wa kura.

Tuhuma za wizi wa kura zinaonekana kushika kasi, lakini tume inayohusika na malalamiko ya uchaguzi imesema kuwa itachukua wiki kadhaa kabla ya kulimaliza suala hilo.

Wakati huo huo, Umoja wa Mataifa umetoa wito wa kuwepo utulivu mpaka zoezi la kuhesabu kura litakapokamilika. Zoezi hilo litaendelea mpaka Aprili 20 huku matokeo yakitarajiwa kutangazwa Aprili 24.

Iwapo hatopatikana mgombea atakayepata zaidi ya asilimia 50 ya kura, basi uchaguzi wa marudio utafanyika mwishoni mwa mwezi Mei.

Uchaguzi huo unafanyika katika wakati ambapo vikosi vya kimataifa vinapanga kuondoka nchini humo mwishoni mwa mwaka huu.

Licha ya uwepo wa maelfu ya vikosi hivyo kwa zaidi ya miaka 12, ghasia zimeendelea kuiandama nchi hiyo na ukosefu wa amani unaendelea kuwa changamoto kuu.

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.